जिल्ह्यात बाल कामगार आढळल्यास कामगार विभागाच्या हेल्पलाईनवर संपर्क साधण्याचे आवाहन

ठाणे :- जिल्ह्यातील विविध आस्थापना, कारखाने, हॉटेल्स, गॅरेजेस, विटभट्टी आदी ठिकाणी बाल कामगार आढळल्यास कामगार विभागाच्या ०२२-२६५७२९२९ या हेल्पलाईनवर संपर्क साधण्याचे आवाहन कामगार विभागाचे उपआयुक्त संतोष भोसले यांनी केले आहे.

दि. १२ जून रोजी जागतिक बाल कामगार विरोधी दिनाच्या अनुषंगाने सर्व दुकाने, आस्थापना, कारखाने, हॉटेल्स, ढाबा, गॅरेजेस, विटभट्टी व इतर आस्थापना मालकांना कामगार विभागामार्फत यासंदर्भात आवाहन करण्यात आले आहे. बाल व किशोरवयीन कामगार (प्रतिबंध व नियमन) अधिनियम, २०१६ अन्वये १४ वर्षाखालील बालकांना कामावर ठेवल्यास अधिनियमातील तरतुदीनुसार ०६ महिने ते ०२ वर्षापर्यंत शिक्षेची तरतूद आहे. तसेच सुमारे २० हजार ते ५० हजार रुपये दंडाची तरतूद आहे. वय वर्ष १४ ते १८ वयोगटाच्या किशोरवयीन कामगारांना सर्व धोकादायक उद्योग व प्रक्रियेमध्ये काम करण्यास प्रतिबंध करण्यात आला आहे.

बाल कामगारांना कामावर ठेवण्यात येऊ नये तसेच बाल कामगार आढळून आल्यास कामगार विभागाच्या ०२२-२६५७२९२९ या हेल्पलाईन क्रमांकावर संपर्क साधावा असे आवाहन विभागामार्फत करण्यात आले आहे.