खेड तालुक्यात शेतकऱ्यांचे उपोषण आंदोलन

राजगुरुनगर (ऋतुजा टाकळकर) : १२ गावच्या शेतकऱ्यांचे चक्री उपोषण आंदोलन सुरू; पुणे रिंगरोड आणि पुणे नाशिक रेल्वे मार्गाच्या जमीन संपादन प्रक्रियेला विरोध दर्शविण्यासाठी खेड तालुक्यातील प्रांत कार्यालयासमोर चक्री उपोषण आंदोलन सुरू केले आहे. १२ गावांपैकी रोज एका गावातील किमान पाच शेतकरी पुढील चार दिवस रोज ज्ञानेश्वरी वाचन करणार आहेत.

तालुक्यातील १२ गावातून पुणे - नाशिक रेल्वे आणि रिंग रोड प्रकल्प होणार आहे. खालुंब्रे, निघोजे, कुरुळी, मोई, आळंदी, च-होली, चिंबळी, केळगाव, मरकळ, धानोरे, सोळू, गोलेगाव या गावांचा समावेश आहे. रेल्वे मार्गासाठी ५० ते ८० मीटर आणि रिंग रोडसाठी सर्रासपणे ११० मीटर अशी एकूण ५८६ हेक्टर जमीन संपादित होणार आहे. सर्व गावांतील शेतक-यांचा जमीन संपदनाला विरोध आहे.

अनेकजण भूमिहीन, अल्पभूधारक होणार आहेत. जमिनी संपादित होणार असल्याने शेतकरी हवालदिल झाले आहेत. या आंदोलनात खेड तालुका रिंगरोड व रेल्वे विरोधी शेतकरी कृती समितीचे अध्यक्ष पाटीलबुवा गवारी, कल्पना गवारी, अनिता शेळके, आणि शेतकरी सहभागी झाले होते.