UPSC, Shivam Vakhare,Success story,यूपीएससीच्या सर्वोच्च परीक्षेत कु. शिवम सीमा राजेंद्र वखरे यांची  गरुड झेप-ज्येष्ठ पत्रकार राजेंद्र वखरे यांच्या मुलाचा विक्रम

कु. शिवम सीमा राजेंद्र वखरे यांची सक्सेस स्टोरी -

देशातील सर्वात प्रतिष्ठेची समजली जाणारी केंद्रीय लोकसेवा आयोगाची म्हणजेच UPSC च्या परीक्षेत डोंबिवलीतील राजेंद्र वखरे यांचे सुपुत्र  कु. शिवम सीमा राजेंद्र वखरे यांनी उत्तुंग यश संपादन केले आहे. त्यांची आय.पी.एस / आय.आर.एस पदासाठी निवड झाली असून या उल्लेखनीय यशामुळे जळगाव  व डोंबिवलीकरांची मान अभिमानाने उंचावली आहे.कु.शिवम यांचे प्रशिक्षण लवकरच उत्तराखंडमधील मसुरी येथे सुरू होणार आहे.

शिवम यांनी अथक मेहनत, जिद्द आणि अभ्यासातील सातत्याच्या जोरावर हे यश मिळवत आपल्या कुटुंबाचे तसेच आपले मूळ गांव बेटावद  बुद्रुक व डोंबिवली शहराचे नाव उज्ज्वल केले आहे. हे यश अनेक तरुणांसाठी प्रेरणादायी ठरेल. 

खानदेशातील जळगाव जिल्ह्यातील  जामनेर तालुक्यात खानदेश व विदर्भाच्या बॉण्ड्रीवर असलेल्या बेटावद बुद्रुक येथील मूळ निवासी व डोंबिवलीतील  रहिवाशी ज्येष्ठ पत्रकार व क्राईम बॉर्डर चे संपादक राजेंद्र वखरे तथा श्री स्वामी सखा (मासिकाच्या) संपादिका सौ.सीमा राजेंद्र वखरे यांच्या पोटी २४ वर्षांपूर्वी कु. शिवम राजेंद्र वखरे यांचा जन्म झाला. 

सौ.सीमा वखरे यांचे माहेर जळगाव जिल्ह्यातील भडगाव तालुक्यात असलेले आमडदे हे असून राजेंद्र वखरे हे  M.A,B.P.Ed,M.C.J असून पत्रकारितेबरोबर त्यांनी अठरा वर्ष सिम्बॉयसिस कॉन्व्हेंट हायस्कूल  मुंब्रा येथे  प्राथमिक व माध्यमिक शिक्षक म्हणून शिक्षक पदावर  कार्य केले . त्यांचे स्वतःचे क्राईम बॉर्डर वृत्तपत्र ते २०१० पासून चालवितात. क्राईम रिपोर्टर वेल्फेअर असोसिएशनच्या माध्यमातून ते सामाजिक कार्य ही करतात. 

तर सौ.सीमा वखरे ह्या , B.A,MCJ असून त्या श्री स्वामी सखा (मासिक) व आश्रय महिला संस्थेच्या माध्यमातून सामाजिक कार्य करतात. 

कु. शिवम राजेंद्र वखरे यांचे मूळ गाव बेटावद बुद्रुक असले तरी त्यांचे संपूर्ण बालपण व शिक्षण डोंबिवली मध्ये गेले.  

त्यांचे प्राथमिक शिक्षण गुरुकुल विद्यालय, कल्याण व माध्यमिक शिक्षण होली क्रॉस इंग्लिश मिडीयम स्कूल, डोंबिवली व ज्युनियर कॉलेज त्यांनी प्रख्यात अशा बिर्ला कॉलेज कल्याण येथे केले. त्यानंतर त्यांचे महाविद्यालयीन शिक्षण मुंबईतील प्रख्यात अशा रुईया कॉलेज माटुंगा, मुंबई या ठिकाणी झाले 

त्यांनी स्टॅटिस्टिक पदवी घेतल्यानंतर यूपीएससीची तयारी सुरू केली तसे पाहता त्यांनी सुरुवातीपासूनच अर्थात शालेय जीवनापासूनच युपीएससीच्या परीक्षा देऊन आपल्या देशासाठी देशातील नागरिकांसाठी कार्य करण्याचे ठरविले. त्यांना दहावी ९३% तर बारावी मध्ये ८४% च्या वर मार्क्स होते तर सर्वोत्तम यश मिळवत ते सांख्यिकी शाखेत पदवीधर झाले. 

घरातील शैक्षणिक  व सामाजिक वातावरण असल्याने त्यांना शिक्षणाची व समाजकार्याची आवड शालेय व कॉलेज जीवनामध्येच लागली होती त्यांनी एन.एस.एस व पावन भूमी चॅरिटेबल ट्रस्टच्या माध्यमातून विविध उपक्रम राबविले.

पदवीच्या निकालानंतर त्यांनी जोमाने खडतर अशा यूपीएससीच्या अभ्यासक्रमाला सुरुवात केली. यासाठी त्यांनी थेट दिल्ली गाठत तिथे अभ्यासाचे धडे गिरवले. तिथे एक वर्ष राहून आल्यावर घरूनच अभ्यास केला.

पहिल्या २०२३ च्या प्रयत्नात त्यांनी प्रीलियम व मेन्स पर्यंत पल्ला गाठला पहिल्या प्रयत्नात त्यांना यश आले नाही .दुसऱ्या प्रयत्नात २०२४ मध्ये त्यांनी मुलाखतीपर्यंत मजल मारली तिथे मात्र त्यांना १४ मार्काने अपयश आले  परंतु त्यांनी खचून न जाता स्वतःसह आई-वडिलांचे स्वप्न साकार करण्यासाठी जिद्दीने अभ्यास सुरू केला आणि तिसऱ्या प्रयत्नात २०२५ मध्ये त्यांनी उत्तुंग भरारी घेत संघ लोकसेवा आयोगाच्या (यु .पी .एस .सी च्या) ६५१ रँक मिळवून यश संपादन केले. 

दररोज कु. शिवम राजेंद्र वखरे यांनी  ८ ते १० तास अभ्यास केला काही वेळेस  १२, १४ तास अभ्यास केला व यश संपादन करून बेटावद बुद्रुक आपल्या मूळ गावासह हल्ली राहत असलेल्या डोंबिवली शहराच्या मुकुटात मानाचा तुरा खोवला.

या अद्वितीय यशासाठी शिवम व त्यांच्या आई-वडिलांचे, गुरुजनांचे मन:पूर्वक अभिनंदन व पुढील वाटचालीसाठी हार्दिक शुभेच्छा!

[ UPSC, IPS/IRS, Shivam Vakhare, UPSC Success, Pride of Dombivli,]