दिवाळीचा आनंद चिमुकल्यांच्या चेहऱ्यावर! लोणावळ्यात आकाशकंदील कार्यशाळा, बालसुरक्षा मार्गदर्शन आणि खाऊ वाटपाचा अनोखा उपक्रम

लोणावळा (प्रतिनिधी - श्रावणी कामत) :- दिवाळी म्हणजे आनंद, उत्साह आणि प्रकाशाचा सण! याच सणाचा आनंद समाजातील चिमुकल्यांपर्यंत पोहोचवण्याच्या उद्देशाने अखिल भारतीय मराठी पत्रकार परिषद, मुंबई संलग्न पुणे जिल्हा पत्रकार संघ, क्राईम बॉर्डर व क्राईम रिपोर्टर वेल्फेअर असोसिएशन, मुंबई आणि निर्भया पथक, लोणावळा शहर पोलीस स्टेशन यांच्या संयुक्त विद्यमाने जिल्हा परिषद शाळा क्र. ६, छत्रपती शिवाजी महाराज विद्यालय, गवळीवाडा, लोणावळा येथे आकाशकंदील बनवण्याची कार्यशाळा, बालसुरक्षा मार्गदर्शन आणि खाऊ वाटप कार्यक्रमाचे आयोजन करण्यात आले होते.

कार्यक्रमाची सुरुवात मान्यवरांच्या हस्ते सरस्वती पूजन व दीपप्रज्वलन करून करण्यात आली. यावेळी ज्येष्ठ पत्रकार श्रीराम कुमठेकर यांनी विद्यार्थ्यांना मार्गदर्शन करत अशा उपक्रमांमधून मुलांच्या कलागुणांना वाव मिळतो आणि त्यांच्यातील सर्जनशीलता विकसित होते, असे मनोगत व्यक्त केले.

चिमुकल्यांच्या हातून साकारले आकर्षक आकाशकंदील!

कार्यशाळेमध्ये पुष्पी अगरवाल, नंदिका कामत, दीक्षिता गुप्ता आणि शीतल अगरवाल यांनी विद्यार्थ्यांना आकाशकंदील तयार करण्याचे प्रात्यक्षिकासह मार्गदर्शन केले. कागद, रंग आणि विविध साहित्याच्या साहाय्याने विद्यार्थ्यांनी स्वतःच्या हाताने सुंदर आकाशकंदील तयार केले. आपल्या कल्पकतेतून साकारलेल्या कलाकृती पाहताना विद्यार्थ्यांच्या चेहऱ्यावर उमटलेला आनंद विशेष लक्षवेधी ठरला. 'आज आम्हाला काहीतरी वेगळे आणि नवीन शिकायला मिळाले,' अशी आनंददायी प्रतिक्रिया विद्यार्थ्यांनी व्यक्त केली.

निर्भया पथकाकडून बालसुरक्षेचे महत्त्वपूर्ण मार्गदर्शन

या कार्यक्रमाचे विशेष आकर्षण म्हणजे निर्भया पथकाच्या पोलीस अधिकारी रिया राणे यांनी विद्यार्थ्यांना दिलेले बालसुरक्षा विषयक मार्गदर्शन. त्यांनी मुलांना गुड टच आणि बॅड टच यातील फरक समजावून सांगत स्वतःच्या शरीराची सुरक्षितता, वैयक्तिक मर्यादा आणि कोणत्याही अयोग्य स्पर्शाबाबत विश्वासू व्यक्तींना सांगण्याचे महत्त्व पटवून दिले.

तसेच अनोळखी व्यक्तींनी खाण्यासाठी काही दिल्यास ते स्वीकारू नये, अशा व्यक्तींपासून सावध राहावे आणि घडलेली बाब तातडीने आई-वडील किंवा विश्वासू पालकांना सांगावी, असेही त्यांनी स्पष्ट केले. मुलांच्या सुरक्षिततेसाठी जागरूकता आणि योग्य माहिती किती आवश्यक आहे, याचे महत्त्व या मार्गदर्शनातून अधोरेखित झाले.

फटाके वाजवताना सुरक्षिततेचा संदेश

इंडियन स्काऊट अँड गाईड लोणावळा गिल्डच्या वतीने विद्यार्थ्यांना दिवाळीच्या शुभेच्छा देण्यात आल्या. यावेळी फटाके वाजवताना आवश्यक ती काळजी घ्यावी, एकट्याने फटाके वाजवू नयेत आणि मोठ्यांच्या देखरेखीखालीच फटाके वाजवावेत, असा सुरक्षिततेचा मोलाचा संदेश देण्यात आला.

खाऊ वाटपातून दिवाळीचा गोडवा

कार्यक्रमात उद्योजक चौधरी आणि युवराज चौधरी यांच्या वतीने विद्यार्थ्यांना लाडू वाटप करण्यात आले. तसेच लोणावळा शहर पोलीस स्टेशन, क्राईम रिपोर्टर वेल्फेअर असोसिएशन आणि स्वर्ग संस्थेच्या वतीने चॉकलेट, शंकरपाळी, चिवडा आणि केक असे विविध खाद्यपदार्थ विद्यार्थ्यांना वाटप करण्यात आले. या उपक्रमामुळे विद्यार्थ्यांच्या दिवाळीच्या आनंदात आणखी भर पडली.

मान्यवरांचा सन्मान आणि उपस्थितांचे सहकार्य

कार्यशाळेसाठी विशेष मार्गदर्शन करण्यासाठी उपस्थित असलेल्या मान्यवरांना ट्रॉफी, प्रमाणपत्र आणि गुलाबपुष्प देऊन सन्मानित करण्यात आले.

यावेळी ज्येष्ठ पत्रकार श्रीराम कुमठेकर, माजी शिक्षिका कुमठेकर काकू, निर्भया पथकाच्या पोलीस अधिकारी रिया राणे, उद्योजक अनंता पाडाळे, इंडियन स्काऊट अँड गाईड लोणावळा गिल्डच्या अध्यक्ष रत्नप्रभा गायकवाड, हेमलता शर्मा, अंबिका गायकवाड, आशिष जांगीर, श्रावणी कामत, दक्षता कमिटी सदस्य नीता गायकवाड, कविता अडसूळे, ज्येष्ठ नागरिक संघाचे माजी अध्यक्ष पांडुरंग तिखे, उद्योजक चौधरी आणि युवराज चौधरी आदी मान्यवर उपस्थित होते.

कार्यक्रमाच्या यशस्वी आयोजनासाठी शाळेतील शिक्षिका, पोलीस कर्मचारी, पत्रकार बांधव आणि सर्व सहकाऱ्यांचे मोलाचे योगदान लाभले. शाळेच्या मुख्याध्यापिका नंदा तांदळे यांनी उपस्थित मान्यवर, आयोजक आणि सहकार्य करणाऱ्या सर्वांचे आभार मानले.

सामाजिक बांधिलकीचा प्रकाश अधिक तेजस्वी!

दिवाळीच्या निमित्ताने आयोजित करण्यात आलेला हा उपक्रम केवळ खाऊ वाटप किंवा मनोरंजनापुरता मर्यादित न राहता विद्यार्थ्यांच्या कलागुणांना प्रोत्साहन देणारा, बालसुरक्षेची जाणीव निर्माण करणारा आणि सुरक्षित दिवाळीचा संदेश देणारा ठरला. पत्रकारिता, पोलीस प्रशासन आणि सामाजिक संस्थांनी एकत्र येत समाजातील बालकांसाठी राबवलेला हा उपक्रम निश्चितच कौतुकास्पद असून, अशा उपक्रमांतून सामाजिक बांधिलकीचा प्रकाश अधिकाधिक घरांपर्यंत पोहोचत आहे.

आयोजक : सौ. श्रावणी धनंजय कामत – अध्यक्ष

सौ. सीमा राजेंद्र वखरे – संपादिका तथा संस्थापक अध्यक्ष