महात्मा गांधी प्राथमिक शाळेचा क्रीडा महोत्सव उत्साहात—लहानग्यांची जिद्द आणि कौशल्याची चमकदार झलक

डोंबिवली : शहरातील रेल चाईल्ड संस्थेच्या महात्मा गांधी प्राथमिक शाळेने भागशाळा मैदान डोंबिवली पश्चिम येथे भरवण्यात आलेल्या वार्षिक क्रीडा महोत्सवाने परिसरातील नागरिकांचे लक्ष वेधून घेतले. सुरेख सजवलेला मैदान परिसर, विद्यार्थ्यांचे रंगीबेरंगी वेष आणि पालकांची उत्स्फूर्त उपस्थिती यामुळे कार्यक्रमाला विशेष रंगत आली.

सकाळी राष्ट्रगीत आणि ध्वजारोहणाने कार्यक्रमाची भव्य सुरुवात झाली. यानंतर आंतरराष्ट्रीय स्तरावर कराटे स्पर्धे मध्ये विशेष नैपुण्य मिळवलेली शाळेची माजी विद्यार्थिनी कु.सई सोमासे व तिचे पालक श्री. दिनकर सोमासे यांच्या हस्ते क्रीडा महोत्सवाचे दमदार उदघाटन करण्यात आले. या शुभ प्रसंगी संस्था पदाधिकारी शाळा समिती माजी अध्यक्ष श्री. मुरलीधर चौधरी, मुख्याध्यापक श्री. जोगी सर सर्व शिक्षक वृंद आणि पालकांची उपस्थिती उत्साह वाढवणारी होती.

क्रीडा महोत्सवातील स्पर्धांमध्ये ५० मी. धावणे, अडथळा शर्यत, चेंडू फेक, सांघिक लंगडी , फन गेम्स अशा विविध प्रकारच्या स्पर्धांचा समावेश होता. प्रत्येक गटातील विद्यार्थ्यांनी दाखवलेली जिद्द, खेळातील कलात्मकता आणि खेळाडूवृत्ती विशेष उल्लेखनीय ठरली. मैदानावर प्रोत्साहनाच्या गजराने वातावरण दुमदुमून गेले.

मुख्याध्यापक श्री.जोगी सर म्हणाले , “विद्यार्थ्यांच्या सर्वांगीण विकासासाठी क्रीडा (खेळ) मैदानी व सांघिक हे अत्यंत महत्त्वाचे माध्यम आहे. आज मुलांनी दाखवलेला उत्साह आणि संघभावना पाहून आम्हाला अभिमान वाटतो.”

क्रीडा महोत्सवाच्या यशस्वी आयोजनासाठी मुख्याध्यापक श्री .जोगी सर यांच्या मार्गदर्शनाखाली क्रीडा प्रमुख श्री. अंगणे सर आणि सर्व शिक्षक व सहाय्यक कर्मचाऱ्यांनी परिश्रम घेतले. समारोपाच्या वेळी विद्यार्थ्यांच्या चेहऱ्यावर दिसणारा आनंद आणि समाधान कार्यक्रमाची खरी शोभा वाढवणारा ठरला.

महात्मा गांधी प्राथमिक शाळेचा यंदाचा क्रीडा महोत्सव उत्साह, सहभाग आणि सकारात्मक ऊर्जेने भरलेला ठरला—आणि सर्वांच्या मनात एक अविस्मरणीय आठवण निर्माण करून गेला.